Y Coetsiws

Mae’r Coetsiws yn adeilad carreg arbennig, sydd wedi ei adfer i’r safonau uchaf, gan ddefnyddio dulliau adeiladu traddodiadol, cerrig, llechi a derw lleol. Ar un ochr mae gardd yr iard gyda digon o le parcio, yn y cefn mae golygfeydd gwych dros y parcdir eang. 

Mae’r adeilad hardd hwn wedi ei ddodrefnu’n chwaethus gyda chelfi antîc a gosodiadau modern i greu cartref cyfforddus iawn.

Mae’r llety’n hyblyg, gyda lle i hyd at ddeuddeng o bobl. Mae'n addas ar gyfer achlysuron teuluol, ffrindiau sy’n dathlu achlysur arbennig, neu ar gyfer grwpiau a chymdeithasau sydd â’r un diddordebau.

Gallwch archebu’r Coetsiws ar y cyd ag unrhyw un o’r bythynnod eraill os oes gennych grŵp mawr (Hyd at 27 o bobl).

Mae mynedfa eang y Coetsiws gyda’i grisiau derw a’i llawr llechi, yn arwain i fyny i ystafell gymdeithasu llawn cymeriad gyda’i tho uchel a’i thrawstiau, a’i llawr derw sglein, gan greu awyrgylch foethus a digonedd o le. Yn un pen mae soffas braf wedi eu gosod o gwmpas stof fawr sy’n llosgi coed mewn lle tân gyda phentan derw. Mae bwrdd cinio hir a chadeiriau derw yn y pen arall, yn barod ar gyfer gwledd.

Y llawr isaf

Mae pedair ystafell wely gyda dodrefn antîc a rygiau traddodiadol. Mae gan y brif ystafell wely ddwbl wely pren antîc ac ystafell gawod en suite gyda basn a thoiled. Mae gan yr ail ystafell wely ddwbl wely pedwar postyn antîc. Mae dwy ystafell wely arall, un gyda dau wely sengl a’r llall gyda thri gwely sengl a basn ymolchi. Mae ystafell ymolchi gyda chawod, basn a thoiled ar gyfer yr ystafelloedd hyn.

Y llawr cyntaf

Mae dwy ystafell wely arall, ystafell ddwbl gyda gwely pres dwbl a golygfeydd o’r parcdir a’r coed, ac ystafell sengl braf sy’n edrych dros yr iard. Ar y llawr hwn mae toiled ar wahân a basn. Mae ystafell gawod ar y llawr isaf ar gyfer yr ystafelloedd hyn. Mae mesurydd i fesur y tanwydd.

Mae cegin sy’n lled-addas ar gyfer arlwyo a choginio ar gyfer grwpiau bach. Mae'n cynnwys gril arlwyo, hob nwy gyda chwech chylch, dau bopty, gril llai , microdon, rhewgell arlwyo fawr, rhewgist, a pheiriant golchi llestri o safon arlwyo, peiriant golchi dillad, peiriant sychu, dau sinc dur gwrthstaen a’r holl offer sydd ei angen i goginio.

Hefyd mae ochr domestig gyda sinc llai i baratoi llysiau a basn llaw. Mae ail set o risiau derw yn arwain o’r fan yma i’r ystafell fwyta.